何用計較, 去欣賞身邊美麗每一天...: 2012

2012年11月23日星期五

別了…

又一次搬家! 又係六年! 唔通我與磚頭的緣份總是敵不過七年之癢! 次次住住下便會心思思想換下環境, 鍾意生活上多點新意! 好彩, 只是對樓不對人!

就算是家居, 也是我喜愛的黑, 白, 灰色調! 再見囉 ~

所以依兩個星期都要留港執拾, 其實耐不耐搬下屋都幾好, 每次都清理一大堆衣服鞋襪及雜物! 人就係咁衰, 對於物質的追求, 永遠窮追不捨! 不過, 自從無返工, 已經買少左好多了! 只是購物對於女人來說, 是最有效的心理治療! 戒不得, 搣唔甩!

2012年11月9日星期五

B.A.B. 週年樂繽紛

2012/11/09 ~ B.A.B. 週年樂繽紛

一個令人異常興奮的約會，人們話十年人事幾番生，這班同學我們相識了又有幾多個十年呢？

年少輕狂，青春、自負、搗蛋、鬥嘴的日子，現在回憶起也甜絲絲，彷如昨天的事！

我常感恩，有成十位同學到現在還保持聯絡，成為今天相知相交的好友！

多謝同學仔帶來當年的舊照片! 但實在太刺激, 放張濛濛地算喇!

畢業後那些年, 都幾靚女喎! 朋友，有幸能遇上您們！

人生, 實在是一場長途賽! 當年唔係好起眼果幾個, 反而嫁得唔錯噃! 當年成績一般般的, 事業卻扶搖直上! 哈 ~

2012年10月29日星期一

TVS Birthday Dinner

2012/10/23 TVS Birthday Dinner

吓! 唔係呀? 仲食緊生日飯? 哈哈! 係咪好幸福呢? 不過唔只我一個, 仲有[克媽媽]Tammy 和Stella, 所以簡稱TVS!

點解影得我咁大隻嘅? 原來真係又肥左! OMG! 唔怪得知之前和同學食生日飯, 比佢地狠批我蘿大, 脾粗, 凸腩! 我知, 我明, 大家只係想警惕我, 唔想我每況愈下啫!

齊齊入長洲食海鮮, 多謝晒各位朋友, 更加多謝Felix 的安排, 個個食得好開心, 仲有伊朗靚相分享, 師傅即係師傅, 啲相真係唔係人咁品!

由於本年度 [九男女@高加索]實在太精彩, 於是我把這段快樂時光製作成2013年座檯月曆送給各團友, 希望大家來年繼續依度去果度去, 開心快樂! 健康自在!

Yahoo Blog 搞咩鬼呀? 係咪想摺埋呢? 已經買少見少, 以前去到版面自己地頭的下方會見到關注網友的最新update, 依家竟然賣埋廣告! 有無搞錯? 咁我點知邊個邊個有新嘢出先? 定係我唔識係第二度可以睇到呢?

2012年10月22日星期一

幸福私房菜

22/10又嚟有食神, 就係Sam哥私房菜! 每次都萬分期待, 次次都超級滿足!

今次跟以往不同, 主打中式! 仲要一人煮一樣帶去, 嘩! 高手當前, 我緊係未夠班, 所以仍然都係出個人得喇, 仍然都係做坐享其成嘅角色! 嘻嘻 ~

雖然話主打中式, 但依個時期, 點可以少得我至愛嘅生蠔 + 香檳!

還有牡丹蝦剌身, 好幸福啊!

依碟澳洲青邊鮑係我 honey整嘅, 炆左成五粒鐘, 好入味, 軟硬適中, 煙煙 un un, 有口感! 大師級水準! 果然真人不露相…. (夠喇, 夠喇,洗唔洗咁誇呀!)

Sam太嘅滷水鵝掌翼, 鴨舌, 送酒一流!

Sam哥嘅和牛火箭菜沙律, 中和了和牛的肥膩感, 好味!

又係Sam哥嘅, 椰菜燴牛尾, 一樣咁好食, 大廚即係大廚, 整咩嘢菜色都咁有水準!

鮑魚, 花膠, 乾瑤柱富貴粥, 咦! 竟然用原隻鮑魚! 明顯有人因時間關係, 實行以本傷人, 一煲過, 真係勁! WH 依招掂! 好嘢!

食完富貴粥, 到Sam太嘅中式甜品出場….. 嘩吓…. 冰糖燉燕窩! 杰到好似食粥仔咁, 好落本啫! 潤成咁, 今勻仲唔靚爆鏡! 呵呵呵… 原來食中式都唔錯喎!

2012年10月11日星期四

2012 ~ 台北 again!

2012/10/03 ~ 2012/10/06

由於從香港飛往石垣島要經台北轉機, 所以回程時便順道留台北四天, 主要食下嘢! 但對於台灣的夜市, 家頭小食等, sorry, 無興趣! 反而覺得在台灣食日本嘢唔錯, 而且價錢合理!

之前朋友已向我推介[食養生房], 睇佢啲相已流口水! 今次當然一定要嘗一嘗! 但大家記住一定先訂位, 假日要一個月前, 閒日亦要一星期前! 真係好爆架! 初頭見到個地址, 啲人都話好遠, 好難去! 又話在深山, 好隔涉! 搞到愛人眉頭皺晒! 差點想放棄! 但其實好簡單, 最方便快捷的方法是由台北車站搭火車往汐科站 (四個站, NT$20.-), 再轉的士 (20 min. NT$240.-) 搞掂!

位於山谷的[食養生房], 淨係個勢已經殺晒!

內外佈局都經過精心安排, 處處見心思! 當我們一進入大門, 突然一陣陽光洒入, 啊! 我竟然可以擁有剎那光輝 ~

黃昏了, 有得食喇! 好嘢!

至於食物方面, 唔算好名貴, 但精緻, 骨子, 有點懷石料理feel!

最後講完心, 就緊係要講金喇! 平到你唔信…. 兩人埋單合共NT$2,420.-!

依家去旅行, 比較鍾情遊山玩水! 陽明山是每次必遊的地方! 風景優美, 又容易行! 當天有點煙霞, 反增添點點詩意喱!

九月份一連去了幾個地方, 雖則意猶未盡, 但都應該會暫時抖抖先! 不過, 並不表示會清閒著, 皆因又有新變動! 有排忙呀!

2012年10月8日星期一

2012 ~ Club Med 初體驗

2012/9/29 ~ 2012/10/03

Hi Hi! 回來了! 但不知為何靈魂與思緒仍然在浮游中! 仍然好不實在, 仲係度發緊夢咁! 或許是太開心吧! 又大了一歲啊! 幸運是我，　一生中能擁有愛我的及我所愛的家人及朋友！　雖不至於萬千寵愛，　但相信也受著百般呵護！　可以肯定的說句此生無憾！

出發前已知有颱風，　心想唔係掛？　真係貴人成咁？　係釜山已遇上一次，　今次又嚟？　不過好好彩，　我們２９號到達，　颱風剛好２８號離開！　感恩再感恩！　颱風過後竟然雨過天晴！

在石垣島Club Med 過了個非常寫意的生日! 五天Club Med 的初體驗, 簡單來說只有食 + 玩! 基本上是全包宴, 早午晚三餐正餐, 包括酒水任食, 再加早(十一點) 午(四點)兩餐輕食; 還有09:30 – 午夜的酒吧任飲! 可以說是全無顧慮, 盡情放肆!

至於玩果方面, 更加不用擔心! 只要你願意, 由你起身果刻直至睡覺, 都不愁沒有活動! 早上８：３０開始，　有環島行，　mountain bike, ９：００－Stretch,　１０：００－yoga (beginner),　１１：１５－水中韻律操；　下午　－　浮潛，　獨木舟，　風帆，　射箭，　及各球類活動，　４：００－Fitness class,　５：００－yoga (advance)；　每晚８：３０有不同的主提表演，　之後便是勁歌熱舞時段!　係咪好充實？　如果有小朋友仲抵, 參加mini club, 由工作人員帶領及照顧, 早午都有活動, 好讓家長也有機會放鬆一下, 享受一下二人世界!

何謂玻璃水，　請大家睇睇！　清到哩！　行出到大脾咁上下深水，　就以經很多魚了！　超興奮！　可惜唔記得帶潛水相機，　死蠢！

話晒都叫做渡假, 所以我都唔會chur 都好盡! 早上玩Yoga (beginner),　下午最開心，　玩浮潛同游水，　所以曬到成個賓妹返嚟！　夜晚就緊係勁舞dancing queen 啦！　嘩！　無跳咁耐，　身痕呀！　而且一大班人一齊跳，　真係好high架!　連愛人同台灣靚太都忍唔住跳埋一份！ Surprise! 所以如果你好似我咁，　又玩得又飲得，　五天package才萬一蚊, 超值！