2011 ~ Monte Carlo (Day 1)

23/6 のMonte Carlo  

                

出發前兩個月,  Sam公子已通知在Monte Carlo 預訂了三星級米芝蓮食 lunch;  當時不已為意,  因為Sam 哥一家都屬於識飲識食,  要求生活質素之人,  難得有人安排,  點都要豪下嘅! 

原來當日係佢母親大人生日,  唔怪得Sam公子今次會join埋我地,  仲訂定位請食飯,  依個死飛仔又幾識做喎!   (註: 其實人地係大律師,  只不過果日佢一身嘅打扮 > 花恤衫, 窄腳褲,  尖頭皮鞋,  太陽超,  龍珠頭!   仲唔係條死飛仔!  哼 ~ )  

Dress code 講明smart casual,  但係問題嚟喇,  smart casual 嘅 standard 各人不同,   Sam 太同我覺得總之唔係著短褲,  拖鞋,  斯文整齊便 o.k.!  所以沒有特別帶衫,  連 high heel 都冇!   之但係 Sam公子就認為母親大人果對 Crocs 太唔似樣,  仲話我地咁樣只係 casual,  冇左 smart 喎 !   係哩個時候,  Sam 哥終於出手 :  咁咪聽朝去買囉,  你憂冇 ?

呵呵呵 !  皆大歡喜....

**********************************************************

Monte Carlo,  只知 casino 好出名!  不過,  我發覺依度啲人應該幾有錢!  係碼頭,  啲遊艇都勁豪華,  而且好多名車都係通街泊! 

          

           

                                                       

         

          

         

唔知依架咩嘢車,  總之 Sam 公子話值一千二佰萬!   嘩!   睇唔出! 
         

          
一朝早走入[飛甩雞毛],   未有客!   Sam太同我一樣屬於細腳,  擇左一兩對都無佢 size,  跟住個 sales 好醒呀,  竟然入倉,  摷晒所有 34.5, 35 號出嚟,  成十對, 八對,  叫我地慢慢試!   嘩!   係名店,  仲係歐洲,  從未有過咁好 services!   本來我無唸住買,   就係咁試下試下,   明啦!   

兩個女人開開心心買完鞋,  橫掂都仲有時間,  睇埋手袋 lu!  走入[嗆 Nel], 又係超好服務!   買完手袋,  還會氹妳買其他 accessories, 一 tray tray 攞過嚟比你睇!  不過,  太貴,  買唔起!

一抽二抨走入餐廳,  未食已經蓮子蓉咁,  啲食物又點會唔好味呀 !   

Wow...  真係好豪華!   我們一枱五人, 由六個人 serve,   先聲奪人!    女士嘅menu 真係 no price,   因為幾多錢完全唔關我地事!   比錢係男士嘅專利!  

         

  

          

            Bon Appetit !

           

             
         像盆栽藝術的沙律, 各式疏菜,  爽甜!
           

       
         凍魚湯, 出奇地好味!
          

  
         
反而主菜普通,  似食紅衫魚,  賣相取勝!  依啲咪係等於人靠衣裝囉!

          

跟住推嚟成車不同品種的芝士,  話明要最 mild,  但係只有我同 Sam 哥頂得住,  其餘都食到翁口翁面,  好搞笑 ! 

嘆完芝士, 突然有個小驚喜…. Happy Birthday to Sam 太,  祝橫睇, 掂睇, 左睇, 右睇,  都唔似咁 senior  嘅靚靚 Sam 太,  年年有今日!  歲歲有今朝!   (講真我都想呀!)   記住妳係我嘅目標啊!   努力!
              

甜品我點了酒浸面包布甸,  Rum 酒味極濃 ! 
              

            
           還有其他甜點送咖啡 !  真係身心極滿足的一天 !
            

            

 

總括這一餐整體確係有水準,  只是食材用料較為普通,  完全沒有貴價嘢!    (可能我地食套餐關係,   所以 Sam 哥同愛人都話下一次一定要食  à la carte)    收咁嘅價錢只不過係食環境,  食氣派,  食服務,  食虛榮!

2011 ~ Cannes

22/6 の Cannes

一講到康城, 就一定想起電影節!  衣香鬢影!  靚人靚景!  遊艇 + 香檳!  由尼斯搭火車,  只需半小時多.  在香港買定 Euro Pass,  最緊要每次記得寫下當天的日期,  以便查票,  好方便!   不過,  由於我們點去點的地方不是太遠,  之後計算下來,  完全無著數,  又要比手續費;  所以應該績次買 point to point 便可,  慳番啲!  

康城, 連個街邊廁所都靚過人.
          

    

    

       

       

     

何謂海天一色?  見到冇?

      

   
沿著海邊行,  享受著熾烈的陽光,  高溫的海風!
      

不過, 依啲靚靚白色 day bed 只供酒店住客享用,  係咪好正呢!

   

    
    依個灘就合格喇!  不過,  仍然仲未有我份, 要等多一, 兩日!
   

還行了些名店,  噢!  見唔到內地同胞,  感覺良好!   好想買,  但想想仲有十幾日行程,  無理由拎住晒四圍走!   最後一日返回巴黎,  乜都有啦!  忍! 

       

     

           

     

     

康城的美是屬於現代加豪華!   o岩晒我哩挺港女!   不過,  跟住仲厲害....嚟到奢華的蒙地卡羅!   出事喇!!!! 

2011 ~ Nice (Day 1)

開始無咩動力寫 blog,  因為好多朋友都棄 blog 轉會 facebook,  搞到個個 blog 都停寫, 令我少左好多野睇!

鬼咩,  寫 facebook 實在太易了,  用 i-phone 是但影張相,  跟手 upload 埋,  最多加幾隻字, 一分鐘內搞掂, 方便快捷.... 反應方面, 咁多個 friend點都會有人望下呱,  又總會有人俾面 like,  自我感覺良好!   相反 blog 呢, 又要 login 又要過相又要執相又要寫字,  搞完一輪之後仲要唔知有無人睇!  

話唔定,  兩三年後連 blog 都變埋歷史,  大家見 yahoo 主頁都無左 blog 條 shortcut 就明啦!

不過,  反正依家得閒,  就當係留比自己嘅快樂印記 !

**********************************************************

21/6 の Nice

到達 Nice,  情緒高漲,  一直期待的蔚藍海岸就在眼前! 
                   

急不及待走去海灘行下,  遇上騎警,  唔知係因為有型啲,  定係有實際需要?
             

    

  

           
水就夠靚喇, 但睇真啲, 係石灘!  扣左少少分!
      

返酒店休息一會,  再出去搵食,  因為日長夜短,  時間好好用,  又唔洗趕行程,  輕輕鬆鬆… 
 
大街同廣場好熱鬧,  買嘢同食嘢都有好多選擇,  而且價錢合理,  難怪吸引咁多遊客!   
          

     
      (出去食飯,  無帶相機,  借用了Sam 太啲相)

       

    

     

2011 ~ Avignon (Day 3)

唔知大家每次去完外地返嚟, 除了住家飯, 最掛住是什麼食物呢 ?  我就最掛念燒味飯.... 咸蛋四寶飯 !  正 !   剛剛先嘆左下午茶, 燒鴨米 + 奶茶,  $20.-  嘩 !  抵到呀 !  好幸福啊 !

20/6 の Avignon

在這裡, 有很多 one day tour, half day tour 任君選擇;  不過我地唔想做鴨仔,  所以選擇了包車,  反正價錢差不多,  但自由度大些!   來接我們的導遊司機是由北京遠嫁到此的小汪,  平時是做文書聯絡工作,  只是依家旺季,  唔夠人手才出動 !   據了解,  她一年只有半年(夏季)有工做,  之後半年(冬季)便會領失業救濟金回北京過冬 ;  而救濟金有薪金的八成,  唔錯喎 ! 

    

Sorry, 言歸正傳,  一開始小汪便告知我們,  最大片的薰衣草田還未開,  她建議車我們另一處範圍不太大,  而已經開晒的田野 !   有點點失望啊 !  旅行就係咁, 好多時要配合天時, 地利, 人和, 強求不來 ! 唯有隨心隨緣 !

第一站 >  Fontaine-de-Vaucluse 碧泉村,  一個小小的村莊,  好寧靜; 看著那清澈見底的泉水, 呼吸著山戀中的靈氣, 確實令人豁然開朗! 

               

         

                  

 

第二站 > 嚟料喇 !  不過,  唔知點解,  覺得今次自己影啲相唔係好得 !  唔夠專注,  太隨意 !     因為那時那刻,  我只想咩嘢都唔做,  呆呆地欣賞每一個景致,   好好享受每一刻! 

最討厭後面有條電纜,  剎風景!   原想放番一, 兩張人比花嬌,  但睇到自己個樣,  真係擇唔落手,  浪費了愛人一番心機!   唔知係佢嘅技術問題,  還是相中人嘅問題?           

      

             

大家不妨留意下,  小汪話人工養殖的薰衣草色澤較深,  而跟住我們參觀的修道院前所開的是天然, 所以體型較細, 色較淺, 但香味反而更濃 !

          

           
沿途還見到好多櫻桃樹,  好可惜只可以遠觀,  唔可以入去採摘 !  不過之後在市場買嚟食,  唔係好甜;  反而,  蜜瓜就好甜,  超多水,  又平, 1 – 2 euro, 所以差不多日日食, 好滋潤 !

第三站 > Gordes (the stone village), 當天的驚喜之一, 被喻為法國最美麗的村莊, 我們就在此食午餐, 餐後再細味她的美態 !

           

                 

             

        

第一次食薄切生牛肉片, 好好味 !  想唔到係依啲鎮仔食到好嘢, 價錢仲好平, 小汪果然好介紹 !    

           

加埋咁豐富嘅甜品, 一食兩個鐘, 好滿足 !

     

飯後, 四處走走,  relax!  千其唔好要我趕!   

              

  

          

       
                  

              

第四站 > 酒莊,  又係第一次 !  不算是大型, 但一定要預約 !  試酒免費, 啲酒其實普通, 麻麻地,  但係我地都好識做買了一紅一白, 當比入場費.
            

      

       

 

        

  

    

酒窖內是天然室溫, 十零度, 涼涼地. 

      

      

   

牆上厚厚的霉菌.

最後還參觀博物館, 加深了一點認識 !  
              

各酒區的分佈圖

AOC 評分的由來及歷史,  始終 1905 年.

    

   
非常完滿充實的一天,  明天便離開 Avignon,  正式進軍[高大衰] ~

Côte d 'Azur  蔚藍海岸!