12月31日 ~ 登別 > 豐平峽
今天是大除夕, 竟然會在一個咁浪漫的地方倒數, 想起都興奮! 以往多年來都是和一班同學一起過, 而且仲愈來愈人多, 有大有細, 拖男帶女, 好熱鬧 ga!
今早天氣好好, 立刻爭取時間出去行下.
見唔見到? 門口都冒緊煙...
對面就是[地獄谷], 好近呢!
行在一陣, 就夠鐘上車回札幌, 唔夠時間呀!
明明剛才還好好天, 點知剎那間, 風雲色變! 從藍變黃, 再由黃變灰, 終於大風雪殺到, 好彩上左車! 大家睇下同剛才的情景差幾遠!
回到札幌, 原先計劃去[定山溪]溫泉村, 因旅遊書介紹那裡秋天時紅葉飄飄, 是追楓必到之地, 而且更是四面環山的著名溫泉區. 昨日溫得唔夠喉, 唔o岩 feel! 今日要補番數!
賣巴士票時, 發覺路線會途經三個不同的溫泉區, 而且還有套票, 來回車票加一次溫泉, 收費1,700.- yen! 吓! 咁抵! 笑晒口上車, 哈哈!
沿途仍然落住大雪, 由於我們要在中途下車, 所以特別要求司機提示我們, 司機叔叔又鬼咁好人, 雖然大家嘰哩沽 lu, 他都很盡力的向我們表達, 原來他叫我們總站才下車, 那裡的溫泉更好, 而且到晚上走的時候也較方便 (因是總站), 他還給我們行車時間表, 包無衰啦! 好, 反正都未去過, 信佢!
一落車, 嘩! 好靚呀! 真係好靚! 原來呢度叫[豐平峽], 好一個隱蔽溫泉!
真係超大雪...
內裡是一間兩層的小平房, 不設留宿, 只供食和浸. 樓下是餐廳, 樓上是更衣及溫泉區. 我就係要呢種喇! 當日所見, 客人不多, 而且都是日本人.
在這小小的餐廳, 望著超靚的雪景, 坐在又暖暖的地上, 吃我喜愛的喬麥麵, 好嘆啊!
我一陣就係出去呢度享受我的露天溫泉!!! 簡直好似拍旅遊特輯一樣...
出面仲靚呀! 最衰唔可以影相!
這次[豐平峽溫泉]之旅, 是今次旅行的最大驚喜! 多謝司機叔叔好介紹! 其實如果唔係太大雪, 可順道遊覽[定山溪]一帶, 在車子經過看到風景都很好, 有很多溫泉酒店, 而且只相差5分鐘車程, 好方便.
晚上趕返出札幌, 心想一定熱鬧得很, count down 喎!
但是, 我做夢都無唸過, 在JR下車, 發覺啲店舖關晒門, 行人稀疏, 冷清清! 同我想像的真係天壤之別! 原來日本人除夕大多回家吃團年飯的. 敝! 間間都閂晒門, 無飯食? 唔係呀?
終於要行到酒店附近才搵到一間, 其實已打定輸數返酒店食.天寒地凍, 食火鍋, 正!
薄燒牛排和燒蟹腳, 當然沒有第一晚那豪華蟹宴咁好食, 好彩個日食左, 除夕同新年休息兩天!
呢種奶白色的叫[地酒], 今次熱飲, 好好飲! 送枝豆一流! 千幾yen, 係日本飲酒好便宜啊! 所以每晚都飲.
今個除夕夜, 可真也夠難忘! 未到十二點便上床, 十幾年未試過! 真誇張!
HAPPY NEW YEAR....
沒有留言:
張貼留言